Одекна звукот на првото училишно ѕвонче низ училиштата. Детски џагор, родителска среќа, насмевки, прегратки, па и по некоја солза радосница или страв од неизвесност беа видливи кај оние кои денеска за првпат тргнаа на училиште. И годинава највозбудени се првачињата. Новата учебна година почна за околу 238 илјади ученици – 64 илјади средношколци и 174 илјади основци од кои околу 15 000 се првачиња. Трета година по ред учебниците навремено се доставени до сите ученици, воведена е едносменска настава во 620 училишта, а паралелно се оптимизираат и паралелките. Со спојување на паралелките кои имаа мал број ученици, оваа учебна година почнува со 433 одделнија помалку.
„На првачињата им посакувам да се описменат, да научат да читаат и пишуваат, многу да се дружат, заеднички да ја делат радоста, понекогаш и тагата, да бидат многу љубопитни и многу да прашуваат, размислуваат и да го кажуваат своето мислење. Среќен почеток и многу успех. Знаењето е многу важно за личниот живот но и за целото општество. Со среќа!“, изјави Весна Јаневска, министер за образование и наука.
До 30 септември ќе важи и мерката за најмалку 15 отсто пониски цени на училишниот прибор, а во октомври се очекуваат и конкурсите за ученички стипендии. Под слоганот „Прекини го кругот на насилство – не биди публика“, почетокот на учебната година е проследен со капмања против врсничко насилство, која ја реализираат Министерството за образование и наука во соработка со „Македонски Телеком“. Кампањата е насочена кон превенција од насилство во училиштата, со акцент на едукацијата и активното учество на младите кон создавање побезбедна средина.
