Четирите најдобри екипи од Југоисточниот регион ќе се борат за титулата регионален шампион на завршниот натпревар на футсал – лигата за основни училишта која ќе се одржи утре со почеток во 9 часот.
На иницијатива на Училишниот спортски клуб „Валандово“, а со поддршка од сите општини од Југоистокот, годинава за првпат се реализира регионална училишна футсал-лига за основци.
Завршниот натпревар ќе се одигра во спортската сала „Филип Втори Македонски“ во Валандово, а по прогласувањето на шампионот на Југоисточниот регион, за сите учесници се предвидени медали и пехари.
– Идејата произлезе од нашиот училиштен спортски клуб, со цел преку спортот да се поттикнат дружењето, социјализацијата и меѓусебната соработка меѓу учениците од целиот регион. Предлогот беше презентиран пред градоначалниците од Југоисточниот плански регион, по што на седница на Советот за развој на регионот, во кој членуваат сите десет градоначалници во Југоистокот, беше донесена одлука за реализација на проектот, велат од Општина Валандово.
Натпреварите се одржуваа во текот на изминатите два месеци, а по завршувањето, по две најуспешни екипи од секоја група обезбедија место на завршниот турнир – „Фајнал Фор“.
Организаторите велат дека доколку се покаже успешен овогодинешниот пилот-проект, во иднина ќе биде проширен и со други спортови и возрасни категории.
