Школата за византиска музика „Калистрат Зографски“, вечер со почеток во 20:00 часот во Центарот за култура „Браќа Миладиновци“ во Струга ќе одржи завршен концерт на византиското псалмопеење, изведено од новите генерации ученици и хористи.
Пред љубителите на духовната музика и културното наследство, ќе настапат детскиот состав под раководство на протопсалт Теофан Санџакоски и диригент Ана Тихонова, женскиот состав под раководство на Теофан Санџакоски и машкиот хор под раководство на хороначалникот и протопсалт д-р Димитри Кумбароски.
Научно-истражувачкиот центар за византиска музика „Архимандрит Калистрат Зографски“ го носи името на истакнатиот игумен и архимандрит на светогорскиот општежителен манастир „Свети Григориј“ – Зограф, Калистрат Зографски (Крстан Санџак), родум од Струга.
Центарот има за цел да ја претстави и афирмира византиската музикологија пред пошироката стручна и културна јавност во Македонија преку содржини на македонски јазик. Својата мисија ја остварува преку творечка и образовна дејност: иницирање образовни програми, развивање мултимедијални и онлајн ресурси, издавачка дејност, снимања, научни истражувања, мајсторски работилници и други активности посветени на зачувувањето и промовирањето на ова драгоцено духовно и музичко наследство.
Влезот на концертот е бесплатен.
