Генералка викенд мора да прерасне во генералка 365 дена бидејќи кога ја штитиме природата се штитиме и себеси, порача претседателката на државата Гордана Силјановска Давкова од Аквадуктот во Скопје кадешто започна еколошката акција „Генералка викенд“.
Еколошката свест за подобра животна средина се гради од мали нозе. Учениците од основно и средно образование преку различни содржини и теми од наставните програми ќе се едуцираат повеќе околу еколошките предизвици и проблеми.
„Генералка викенд 2025“ поддршка доби од градоначалници и организации. Над 200-те волонтери беа вклучени во целата акција каде што масовно чистеа и порачаа дека постојано ќе се борат за почиста средина.
Амбасадорот на Австрија во државава, Мартин Памер вели дека е среќен што акцијата „Генералка викенд“ се одвива неколку години и е спремен и тој да учествува во неа.
Скопјани по социјалните мрежи постојано реагираат дека Скопје до сега не било во полоша состојба со отпадот. Улиците секојдневно се поплавени од ѓубре, главниот град се удави во смет и депонии, заради неработењето на јавното комунално претпријатие и несоодветниот однос на градоначалничка Данела Арсовска.
Давид Крстевски
