Во село Костин Дол денеска започна асфалтирањето на патот кон месноста Папурица, проект што претставува значаен чекор во подобрување на патната инфраструктура во овој дел од општината.
Како што информира градоначалничката Соња Стаменкова, станува збор за долгогодишна потреба на жителите, која конечно се реализира со цел да се обезбеди подобра поврзаност и поквалитетни услови за секојдневниот живот.
– Продолжуваме да градиме инфраструктура што ги поврзува луѓето и создава подобри услови за живот во секое населено место. Овој проект е уште еден доказ за нашата посветеност кон рамномерен развој – изјави Стаменкова.
Со реализацијата на овој зафат се очекува да се подобри безбедноста во сообраќајот, да се олесни пристапот до населеното место и да се создадат услови за понатамошен локален развој.
Од Општината нагласуваат дека инвестициите во патната инфраструктура остануваат приоритет, со цел да се обезбедат видливи резултати и трајни придобивки за граѓаните.
Локалната самоуправа најавува дека и во наредниот период ќе продолжи со реализација на слични проекти, насочени кон подобрување на квалитетот на живот и развојот на сите населени места во Општина Македонска Каменица.
