Започна асфалтирањето на локалниот пат кој ги поврзува селата Косевица и Моштица, како и кракот кон Горанско Маало во рамки на село Косевица, информираше денеска градоначалничката на Општина Македонска Каменица, Соња Стаменкова.
Станува збор за инфраструктурен проект со вкупна должина од 1.817 метри на делницата Косевица – Моштица и дополнителни 402 метри кон Горанско Маало. Вкупната вредност на инвестицијата изнесува 21.204.459 денари.
Според Стаменкова, со реализацијата на проектот ќе се подобри патната поврзаност меѓу населените места, ќе се зголеми безбедноста во сообраќајот и ќе се унапредат условите за живот на жителите од овој дел на општината.
Таа нагласи дека Општина Македонска Каменица продолжува со континуирани инвестиции во инфраструктурата, со цел обезбедување рамномерен развој на сите населени места.
– Секој реализиран проект претставува чекор напред кон поразвиена и поубава општина, изјави Стаменкова.
