На Клиниката за инфективни болести хоспитализирани се вкупно седум пациенти од западнонилска треска, од кои двајца се во потешка состојба. Директорот на Клиниката Фадил Цана денеска оцени дека состојбата со западнонилската треска стивнува.
-Во текот на последнава недела, да не кажам и десет дена, само еден суспектен хоспитализиран пациент, додека другите се истите шест потврдени пациенти, од кои два се потешко болни и сè уште се на респираторна поддршка и се наоѓаат во Одделот за интензивна нега. Останатите се стабилни и се на Одделот за невроинфекции, изјави Цана.
Кај двајцата пациенти кои се во потешка состојба, сеуште нема подобрување.
Сите пациенти се повозрасни. Последниот случај е пациент на 70-годишна возраст.
Здравствените власти очекуваат со намалувањето на температурите дополнително да стивне западнонилската треска.
– Очекуваме како што опаѓаат температуриве, да заврши и оваа епидемија, заради тоа што по сите светски статистики така се одвива епидемијата, во доцните летни месеци, т.е. септември, се очекува пад. Но, мора да го кажеме и тоа дека по преземените мерки од здравствените власти и локалните власти, особено во општините што беа зафатени со епидемија, се гледаат резултати и имаме намален број на инфицирани, рече Цана.
Видеото може да го погледнете на следниот линк:
