Заев негира поврзаност со аудио снимките на кои се слуша гласот на Антонио Милошоски, а се појавија на јутјуб. Иако пратеникот на ВМРО-ДПМНЕ се сомнева како што рече дека токму лицето З.З. стои зад објавувањето, лидерот на СДСМ вели дека снимките кои биле во партијата се предадени на СЈО. Повика да се истражи кој ги објавува снимките.
“Дефинитивно ние ја завршивме нашата обврска и при крајот на 2016 година ги предадовме сите материјали во СЈО. Објавивме пакет од 35 „бомби“ и кога постигнавме договор за пржинска влада застанавме, материјалите ги спакувавме на хард-дискови и текстуално и ги предадовме. Да не заборавиме кој прислушуваше и дека ние добивме само еден дел од материјалите, односно добивме околу 30 отсто од создадените материјали”, изјави Заев.
За претседателот на ВМРО-ДПМНЕ очекувано е Заев да негира поврзаност со објавите на јутјуб бидејќи во спротивно ќе станело јасно дека сите материјали не биле предадени. Според Мицкоски, најдоборо би било Заев да ја прифати поканата од Милошоски за дуел.
“Претпоставувам дека имаат некои работи кои ги имаат како недокажани со Милошоски. Во периодот кој следи верувам дека ќе имаат што да си кажат и едниот и другиот. Најдобро би било бидејќи бега од мене на повторно соочување барем да прифати со Милошоски да се соочат на некој медиум па да продискутираат што имаат за работите меѓу нив двајца кои остануваат недокажани”, изјави Мицкоски.
Милошоски пред два дена во изјава за Алфа го повика на дуел лицето З.З за да објават што имаат еден за друг и јавноста да суди кој треба да се појави на суд. Пред да се појават снимките од Милошоски тој во собрание и партиското седиште презентираше аудио материјали во кои се слуша гласот на заев и во кои се збори за финансирањето на 1 ТВ и судството.
Градимир Марковски
