Еден закон, повеќе грешки, различни толкувања. За Заев двојазичната табла на Јавното правобранителство во Струмица е грешка и треба да се отстрани. Истото во дуелот со Мицкоски го кажа и за Прилеп. Лидерот на СДСМ смета дека не треба да има двојазични табли во општините каде застапеноста на албанската етничка заедница не надминува 20 проценти.
“Јас сум информиран и дека на Јавното правобранителство во Струмица стои двојазична табла која што верувам дека брзо и веднаш ќе ја отстранат, заради тоа што немаме повеќе од 20 отсто и нема кој да го користи албанскиот јазик во Струмица. Во Струмица има само едно семејство Албанци-пекари кои го прават струмичкиот бурек, но тие го зборуваат увабо и македонскиот јазик и секако само едно семејство не се 20 отсто. Како што реков, во Кочани беше отстранета и во некои други места се отстранети, така да законот треба да се применува низ призмата на практичната потреба, а не за исилување на една заедница врз друга заедница”, изјави Заев.
Според Бујар Османи од ДУИ, во Прилеп и Велес треба да има двојазични табли. Агенцијата и инспекторатот за примена на двојазичноста биле единствено надлежни да одлучуваат.
“Општина Прилеп, во која припаѓа и Општина Долнени, бројката е над 20 насто, што значи таблите треба да бидат двојазични, исто како што е и Општина Велес во која со селата има бројка од 20 отсто албанско население”, изјави Османи.
Техничкиот премиер Оливер Спасовски смета дека во законот има јасни одредби за тоа каде можат да се употребуваат јазиците.
“Сосема е јасно каде и на кои места и во кои општини може да се употребуваат јазиците, односно тоа е секаде каде што имаме повеќе од 20 проценти припадници на етничка заедница, којашто живее во земјава”, изјави Спасовски.
Изминатиов период постои револт поради двојазичните табли. Во источниот дел од државата и оние средини каде нема етнички Албанци дел од таблите беа искршени.
Градимир Марковски
