Екоактивистите бараат построги услови за увоз на возила во Македонија. Бараат да се забрани увоз на користени возила кои се постари од 10 години и под „ЕУРО5“ стандардот, а новите што се увезуваат да бидат со минимален „ЕУРО6“ стандард.
Вакво барање упатија екоактивистите од десет граѓански организации до владата и лично до премиерот Христијан Мицкоски откако, посочија, дека има најави оти во 2025 година ќе се намалат даноците за емисијата на јаглерод диоксид и на данокот за ДДВ.
Претставниците на невладините организации денеска ги доставија барањата и писмено до Владата. Ова, нагласуваат, е само една од мерките за борба против аерозагадувањето, бидејќи старите коли испуштаат над 200 токсични соединенија од кои голем дел се канцерогени и влијаат на мутација на гените, а најпогодени се децата.
Во Македонија само од јануари до ноември оваа година увезени се 53.826 автомобили. Од нив, речиси 70 проценти биле половни. Во јавно достапните податоци од царинската управа нема податок која е староста и еуро-стандардот на возилата. Според податоците од МВР, пак, просечната старост на автомобилите што ги возат македонските граѓани е 20 години.
