И оваа година, како и претходните, во пресрет на годишнината од раѓањето на Гоце Делчев, во Софија се отвори прашањето – зошто нема заедничко одбележување. Ова прашање БТВ му го постави на бугарскиот министер за надворешни работи Георг Георгиев.
„Не сме добиле покана за такво нешто. Последното беше по потпишувањето на договорот за пријателство и добрососедство во 2017 година, ако не се лажам. До овој момент ние немаме покана од Македонија заедно да го чествуваме тој ден“, изјави шефот на бугарската дипломатија.
Како што објавија медиуми од соседството, годишнината од раѓањето на Гоце Делчев била одблежана од бугарската амбасада во Скопје и Генералниот конзулат на Бугарија во Битола. Во 2017-та и 2019-та тогашните премиери Зоран Заев и Бојко Борисов заедно положија цвеќе на гробот на Делчев.
Последното заедничко чествување беше во 2022 година, на министерско ниво. Во 2023 година, во време кога односите меѓу Бугарија и Македонија дополнително се затегнаа, тогашниот бугарски вицепремиер Иван Демерџиев положи цвеќе на гробот на Делчев, но не во присуство на македонските колеги. Тој реагираше и поради техничкиот проблем, системот за контрола на македонскиот граничен премин, поради кој голем број Бугари биле оневозможени навреме да дојдат во Скопје.
