Создавање млади кадри кои ќе одговорат на потребите на современиот пазар на труд е целта на новиот проект што денеска беше промовиран од Министерството за дигитална трансформација. Надлежните велат дека со подобрување на образованието преку развивање на дигитални вештини ќе се создаваат подготвени генерации кои ќе можат да одговорат на предизвиците на модерното дигитално време.
Проектот опфаќа вкупно сто училишта, повеќе од илјада наставници ќе поминат обука од тренери кои што ќе ги обучат како да ги користат овие микро бит уреди во нивната настава, зборуваме за четврто и петто одделение, ќе се употребува во сите наставни предмети, по сите наставни предмети ќе може да прават вакви проекти со микро битови, ќе учат основи на програмирање, основи на вештачка интелигенција, основи на сајбер безбедност, нормално на прилагоден начин за таа возраст и очекувам дека од тие материјали што ќе ги произведеме, тоа ќе бидат и прирачници, како и наставниците во погорните одделенија да ги користат микро-битовите во наставата и да работат на реални проекти, вели министерот за дигитална трансформација, Стефан Андоновски.
Проектот е реализиран како соработка меѓу Министерството за дигитална трансформација, Британскиот совет и Македонски телеком.
Програмата покажа дека иновациите во образованието можат да се зголемат и да бидат одржливи, изјави британскиот амбасадот Метју Лосон.
Сметаме дека како партнери со ова помагаме на иднината на нашите деца пред се, затоа што преку некои нови вештини кои ќе ги стекнат ќе бидат многу поспремни за времето кое доаѓа, истакна Горан Марковиќ, главен извршен директор на Македонски Телеком.
Секоја инвестиција во способностите на младите е инвестиција во иднината на државата: подобри можности за младите се гаранција за развивање на поконкурентна национална економија.
Ана Минин
