Хаос во Фондот за здравство. Втор ден власта ги игнорира барањата на вработените во ФЗОМ кои бараат да ја коригира препораката и да се откаже од намалувањето на ионака мизерните плати. .И додека надлежните размислуваат што ќе прават со примањата на над 830 вработени – граѓаните ја плаќаат цената и “висат” пред шалтерите. Жена со документи за инвитро каде што има броени денови со важност на документацијата, беше вратена од подрачната служба. Пациент крводарител, кој над 50 пати дарувал крв и на кој му следува бесплатно здравство поради штрајкот ќе биде приморан интервенцијата да си ја плати на приватно.
Поддршка за штрајкот на ФЗОМ освен од граѓаните, стигна и од лекарската фела. Приватните матични лекари го поддржуваат незадоволството на вработените. Сметаат дека владата треба да ја преиспита својата одлука.Затоа што според нив, со ова дополнително се долева масло на огнот и наместо да се преземат чекори со кои би се задржале лекарите во земјата дополнително се стимулира одлив на кадар.
Поддршка за штрајкот во Фондот стигна и од министерот за здравство Меџити.
Со затворањето на вратите на Фондот за здравство нема да има исплати на боледувања и рефундации, а нема ниту плати и капитација за лекарите. Од синдикатот велат дека не отстапуваат од барањето да не им се намали платата за 21 отсто како што предложи Владата.
Според нивните пресметки со кратењето на платите ќе се дојде до сума од еден и пол милиони евра што е помалку од половина отсто во вкупниот Буџет за Фондот за здравство.
А како единствен услов за да престане штрајкот е министертвото за финансии да се откаже од најавеното кратење на платите за дури 21 отсто со што голем дел од вработените би стигнале до минималец.
Ања Лукарова
