Денеска почна вонредниот инспекциски надзор на Државниот санитарен и здравствен инспекторат за смртта на деветгодишното дете од Свети Николе, кое почина во вторникот на детската клиника во Скопје. Вонредниот инспекциски надзор за лекувањето на детето се води на три места – почнувајќи од матичниот лекар, Клиничка болница – Штип, па на клиниката за детски болести во Скопје.
Од штипската Клиничка болница соопштија дека детето било донесено на Одделот за детски болести на 14 јануари во 18 часот во „тешка општа состојба“, од каде по итна интервенција било префрлено до детската клиника во Скопје, каде починало по два часа. Според првичните извори од инспекторатот, детето било примено на детската клиника во екстремно тешка состојба. Веднаш било згрижено од тим специјалисти и доктори од Одделот за интензивна нега. Направени биле анализи и утврдено било пореметување на електролитни вредности, тешка ацидоза и дехидрација, како и респираторна и срцева попуштање.
