Водостоите на поголем дел од реките во државата се движат околу или над просекот за август, додека кај природните езера нивото на Охридското Езеро е над просечната вредност за месецов, а Преспанското и Дојранското Езеро остануваат под августовскиот просек, покажуваат денешните мерења на Управата за хидрометеоролошки работи.
Според податоците измерени во 7:30 часот, водостојот на Вардар кај Скопје изнесува 74 сантиметри и е за четири сантиметри над просекот за август, кој изнесува 70 сантиметри. Кај Велес се измерени 46 сантиметри, што е за пет сантиметри над просечната вредност за месецов, додека кај Демир Капија водостојот достигнува 132 сантиметри и е значително над августовскиот просек од 84 сантиметри.
Над просекот е и водостојот на Брегалница кај Штип, каде се измерени 80 сантиметри, односно 11 сантиметри повеќе од вообичаеното за овој период од годината. Од друга страна, кај дел од реките се регистрирани пониски нивоа од просечните, меѓу кои се Лепенец кај Влив, Крива Река кај Крива Паланка, Брегалница кај Берово, Црна Река кај Новаци и Радика кај Бошков Мост.
Кај природните езера, нивото на Охридското Езеро е измерено на 693,49 метри надморска височина и е малку над августовскиот просек од 693,46 метри. Преспанското Езеро е на кота од 841,6 метри надморска височина, што е за повеќе од два метра под просекот за август од 843,88 метри, додека нивото на Дојранското Езеро изнесува 145,08 метри надморска височина, наспроти просечните 147,69 метри за месецов.
Од УХМР посочуваат дека нивото на Дојранското Езеро и натаму е 105 сантиметри под договорениот минимум, а според хидролошката прогноза, во текот на наредниот ден не се очекуваат позначителни промени на водостоите на реките и езерата.
