И покрај екстремното хиперхлорирање на градскиот водовод, водата во Гостивар сe уште не е безбедна за пиење. Кризниот штаб кој го раководи министерот за внатрешни работи Панче Тошковски соопшти дека опасната бактерија “Псеудомонас” и понатаму е присутна во водоводната мрежа.Затоа не можат да се добијат трите последователни исправни лабораториски анализи.
Министерот Тошковски најави дека ќе се зголеми континуитетот на мерења на клвалитетот на водата од страна на повеќе институции.Тој смирува – граѓаните и понатаму ќе бидат обезбедени со бесплатна флаширана вода.
“Анализи на водата да се спроведуваат почесто, односно да се зголеми зачестеноста на мерењата на квалитетот на водата од страна на повеќе надлежни институции.Штом добиеме три последователни анализи што ќе потврдат дека водата е исправна за пиење на сите мерни точки во градот, ќе ги известиме граѓаните дека може безбедно да ја користат и за пиење, а не само како техничка вода, како што е случајот сега” – изјави Тошковски.
Експертите во однос на бактеријата велат дека нема потреба од паника, проблемот со водоводната мрежа ќе биде решен во најскоро време.
И според инфектологот д-р Вело Марковски нема простор за паника во Гостивар, тој вели дека најлошото веќе е поминато.
Додека институциите бараат решение, во екот на летните горештини, гостиварци водата можат да ја користат само за бањање, перење и миење садови, додека жедта ќе ја гаснат само со флаширана вода, донирана или купена.
