– Водата за пиење од јавниот водовод во Куманово континуирано е здравствено исправна и безбедна за употреба, покажуваат резултатите од редовниот мониторинг што го спроведува Центарот за јавно здравје Куманово во соработка со ЈП „Водовод“ – Куманово. Раководителката на Отсекот за здравствено-хигиенски прегледи, училишна хигиена и исхрана при Центарот за јавно здравје Куманово, д-р Блерта Шахини Азизи, специјалист по хигиена и здравствена екологија, информира дека мострите од водата се земаат еднаш неделно, секој понеделник, согласно утврдениот план за мониторинг.
Во текот на годината се анализираат вкупно 130 мостри од различни локации кои ја опфаќаат целата територија на Куманово, со цел да се добие репрезентативен увид во квалитетот на водата за пиење.
-Досегашните лабораториски анализи покажуваат дека сите испитани мостри ги исполнуваат пропишаните услови и се во согласност со законските и санитарно-хигиенските стандарди. Во рамки на испитувањата редовно се следи и нивото на резидуален хлор, кој е еден од најважните показатели за безбедноста на водата за пиење. Анализите покажуваат дека најниските измерени вредности на резидуалниот хлор изнесувале 0,3, 0,44 и 0,47 милиграми на литар, што, укажува на континуирано и соодветно ниво на дезинфекција на водата- вели докторка Шахини Азизи.
Врз основа на добиените резултати, од Центарот за јавно здравје Куманово оценуваат дека водата од јавниот водовод континуирано ги исполнува барањата за здравствена исправност и може безбедно да се користи за пиење и секојдневна употреба.
