– Во Струмица денеска почна јавната расправа во рамките на постапката за изработка и донесување на Просторниот план на Република Северна Македонија (2021-2040), стратешки и законски документ кој го определува идниот развој на државата во областа на просторното планирање.
Важноста од подготвување на Просторниот план ја образложија претставници на Министерството за животна средина и просторно планирање и на Агенцијата за просторно планирање.
-Просторниот план не е само уште еден плански документ, туку тој треба да даде одговор на едно вистинско прашање: каде сакаме да ја видиме нашата држава во 2040 година и како одговорно ќе управуваме со просторот со кој располагаме. Просторот е ограничен ресурс. Одлуките што ги носиме денес често имаат последици со децении. Еднаш изградена инфраструктура, зафатено земјиште, нарушен природен ресурс или обратно-добро испланиран развоен коридор долгорочно го определуват начинот на кој се развива одреден простор, рече Неби Реџепи, раководител на секторот за просторно планирање при Министерството за животна средина.
Најмногу внимание кај присутните граѓани, од кои најголем дел беа еко активисти кои се против отворање рудници во југоистокот од државата, предизвика делот од нацрт просторниот план кој се однесува на минералните суровини во овој регион и лоцирањето на истите.
Според еко активистот Горан Станислевиќ, економскиот биланс од рудникот Иловица-Штука би бил негативен.
– За 20 години ќе се уништи почвата од тешки метали и земјоделците тешко ќе можат да ги продаваат сцоите производи заради тоа што тие што купуваат ќе знаат од каде потекнуваат. Потоа ќе се загадат подземните води што значи дека и еколошкиот ефект е голем, односно ни си одзема нашето човеково право на вода, бидејќи е планирано идниот рудник да користи вода од акумулацијата „Турија“, со што се доведува во прашање снабдувањето со вода на населението во градот и населени места, рече Станислевиќ.
Според Петар Спасов, поранешен градоначалник на Општина Ново Село, интересно е зошто планината Беласица не е предвидено да биде прогласена за национален парк, бидејќи затоа постои иницијатива од поодамна. Тој нагласи дека несфатливо е Беласица да не биде национален парк, а да се планира отворање рудник.
Денешната јавна расправа ја организираше Центарот за развој на Југоисточниот плански регион – Струмица, а домаќин беше Министерство за животна средина и просторно планирање.
