Општина Штип утре во периодот од 1:00 до 7:00 часот наутро, преку овластена фирма ќе спроведе терестичка дезинсекција со цел уништување на комарците на територијата на општината. Третманот ќе се изведува со апаратура за УЛВ ладно запрашување, информираат преку соопштение општина Штип.
Во него се наведува дека со дезинсекцијата ќе бидат опфатени зелените површини во Општина Штип, подрачјата по течението на реките Брегалница и Отиња, застојните води, подрачјата околу каналскиот систем, урбаните населби и другите локалитети каде што постојат услови за развој на комарци. Доколку временските услови бидат неповолни, како што се дожд, ветер или други околности што го оневозможуваат спроведувањето на третманот, активноста ќе биде одложена за првиот нареден ден со поволни временски услови.
Воедно, од општина Штип, ги известуваат пчеларите навремено да ги преземат потребните мерки за заштита на пчелните семејства за време на спроведувањето на дезинсекцијата.
