Шеесет млади натпреварувачи учествуваа во Градскиот пливачки натпревар „Штип 2026“, кој се одржа во новоотворениот затворен базен. Ване Маневски, кој е дел од организацијата на натпреварот, вели дека денешниот натпревар е од исклучителна важност за развојот на пливачките спортови, бидејќи по долг период на стагнација на пливачкиот спорт во Штип – пред сè поради долгогодишниот недостиг на соодветна инфраструктура и услови – локалните клубови конечно го покренаа овој спорт од „мртва точка“.
– Преку овој настан, јавноста имаше можност да ги види првите реални резултати, напредокот и дисциплината на децата кои за само неколку месеци ја совладаа оваа благородна вештина-вели Маневски.
Учесниците во натпреварот беа поделени во две возрасни категории (машка и женска конкуренција): категорија А: деца од 6 до 10 години (родени јуни 2017 – јуни 2020) кои пливаа во дисциплината 25 метри (1 должина) и категорија Б: деца од 11 до 14 години (родени јуни 2014 – јуни 2017), кои пливаа во дисциплината 50 метри (2 должини).
Овој натпревар е во организација на Пливачкиот ватерполо клуб (ПВК) „ВИДРА“ Штип, во соработка со ВК „8-ми Ноември Мастерс“ Штип.
