Со мотото „Откриваме и вкусуваме приказни од Малешево“, во пехчевското село Негрево се одржа настан по повод одбележувањето на Денот на Европскиот зелен појас (Green Belt Day) . Настанот го организираа здружението „Амброзија“ од Пехчево и здружението „Биоматера“ од Бугарија, со учество на околу 30 претставници од двете земји.
Манифестацијата која се одржува секоја година при крајот на септември беше посветена на запознавање со природното богатство на Малешевијата и значењето на зелените појаси како простор за поврзување на луѓето, природата и прекуграничните заедници.
Учесниците реализираа теренска прошетка по Патеката на Петко до локалитетот Јудови Ливади, каде што се наоѓа специфичното тресетиште – живеалиште на реткото инсектојадно растение муволовка (Drosera rotundifolia), кое е еден од препознатливите природни симболи на Пехчевскиот регион.
Во рамки на настанот се одржа презентација за значењето на Европскиот зелен појас и беше потпишан Меморандум за соработка меѓу „Амброзија“ и „Биоматера“ за идни заеднички активности насочени кон зачувување на природата и развој на прекуграничната соработка.
Посетителите имаа можност да дегустираат и традиционални гастрономски специјалитети од регионот. Активноста се надоврза на претходниот Проект за зачувување на автохтоните сорти овошки од Малешево и Беласица, во чии рамки беа реализирани мапирање на старите сорти, обуки за ревитализација на оштетени дрвја и калемење.
Европскиот зелен појас се одбележува секоја година во септември со цел промоција на природното и културното наследство долж поранешната Железна завеса.
