Општина Пехчево денеска со повеќе активности го одбележа Денот без автомобили, во рамки на Европската недела на спортот, која од 22 до 30 септември се реализира под мотото „#BeActive“, како дел од националната иницијатива MOVE MK, координирана од Министерството за спорт.
Во соработка со ООУ „Ванчо Китанов“ – Пехчево, учениците учествуваа во велосипедско возење и активности на велосипедски полигон во училишниот двор, боење цртежи со велосипеди и изработка на цртежи на тема „Денес учиме да бидеме безбедни во сообраќајот“.
Во рамки на активностите, претставници од Полициската станица од општа надлежност – Берово одржаа предавање за безбедноста на пешаците и правилното однесување во сообраќајот.
Во одбележувањето се вклучија и Здравствениот дом „Иван Ѓеорѓиев“ – Пехчево и Полициската станица од општа надлежност – Берово, со што беше ставен акцент на заедничкото делување на институциите во поттикнувањето на здрави животни навики и создавањето побезбедна локална заедница.
Со велосипедско возење и пешачење, учесниците испратија порака за значењето на секојдневната физичка активност, но и за можностите за користење поодржливи начини на движење.
Од Општина Пехчево посочуваат дека Денот без автомобили е можност за подигнување на свеста за влијанието на секојдневните навики врз животната средина и здравјето на граѓаните.
Активностите во Пехчево продолжуваат во рамки на Европската недела на спортот, со која се промовира физичката активност и активниот начин на живот во училиштата, спортските клубови, работните места и јавните простори.
