Завршија градежните работи за изградба на три улици во населбата СРЦ во Делчево, во вкупна должина од 400 метри, информира градоначалникот на Општина Делчево, Иван Гоцевски.
Како што посочува Гоцевски, пред изградбата на улиците во овој дел од населбата била реализирана и изградба на подземната инфраструктура, со што се создадени услови за целосно уредување на потегот.
Изградена е атмосферска канализација во должина од 538 метри, фекална канализација во должина од 165 метри и водоводна мрежа во должина од 304 метри.
Вкупната вредност на проектот изнесува 10.204.477 денари, средства обезбедени од Владата преку Министерството за транспорт. Изведувач на градежните работи е ДПТУ „ОСД Кирил“ ДООЕЛ експорт-импорт Штип.
– Со реализацијата на овој проект се реши долгогодишниот проблем со патната и другата инфраструктура во оваа делчевска населба и се создадоа услови за безбедно, функционално и модерно домување на жителите, како и современи урбани услови за развој на населбата, наведува Гоцевски.
Тој додава дека инфраструктурните проекти се дел од определбата за рамномерен развој на сите населби и делови од градот.
– Кога градиме улица, не градиме само пат – создаваме услови за подобар и поквалитетен живот. Наш приоритет е инфраструктурата да стигне до секоја населба и секој дел од Делчево, затоа што рамномерниот развој значи еднакви услови за живот за сите наши граѓани, наведува градоначалникот.
Гоцевски најавува дека во населбата СРЦ наскоро треба да започне реализација и на нови проекти финансирани од општинскиот буџет.
Од Општина Делчево посочуваат дека со продолжувањето на инфраструктурните инвестиции се очекува дополнително подобрување на условите за живеење и уредување на урбаните делови од градот.
