Со пригодна церемонија и положување цвеќе, денеска во Македонска Каменица беше одбележана 82-годишнината од смртта на народниот херој Вера Јоциќ.
Во знак на почит кон нејзиниот лик, дело и жртва, цвеќе беше положено пред споменикот на Вера Јоциќ во Македонска Каменица, каде присуствуваа претставници на Општина Македонска Каменица, членови на Советот на Општината, како и претставници од повеќе локални институции и организации.
Во рамки на одбележувањето, делегации положија цвеќе и пред споменикот на народниот херој во село Саса, оддавајќи почит кон нејзиниот придонес во Народноослободителната борба и нејзината улога во македонската историја.
Од Општината истакнаа дека негувањето на споменот за народните херои претставува важен дел од колективната меморија и историското наследство на државата, особено за младите генерации кои преку ваквите настани имаат можност да се запознаат со значајните личности и настани од минатото.
Вера Јоциќ е една од најпознатите учеснички во Народноослободителната борба, а нејзиното име и денес претставува симбол на храброст, пожртвуваност и борба за слобода.
Со денешното одбележување, граѓаните и институциите од Македонска Каменица уште еднаш ја потврдија определбата за зачувување на историското наследство и оддавање почит кон личностите кои оставиле траен белег во македонската историја.
