По повод Европската недела на мобилност, во салата на ООУ „Крсте Петков Мисирков“ во кочанската населба Оризари денеска се одржа едукативно предавање посветено на безбедноста во сообраќајот, под мотото „Безбедно движење – заедничка грижа на сите!“.
Предавачи беа претставници од Полициската станица Кочани, кои пред учениците и родителите говореа за правилата и законските прописи кои треба да се почитуваат за поголема безбедност во сообраќајот.
На предавањето беше посветено внимание на безбедното управување со велосипеди и електрични тротинети, правилното и безбедно преминување на пешачки премин, како и на одговорното однесување на сите учесници во сообраќајот.
Во активноста учествуваа ученици од прво до деветто одделение, заедно со нивните родители. Учениците, пак, подготвија и драматизации преку кои на креативен начин ги претставија опасностите и правилното однесување во сообраќајот.
Особено значајно беше тоа што учениците имаа можност отворено да ги споделат и проблемите со кои секојдневно се соочуваат како пешаци и велосипедисти, како и своите размислувања за тоа што може да се направи за нивно поголемо безбедно движење.
Од училиштето посочуваат дека ваквите активности имаат големо значење за подигнување на сообраќајната култура кај најмладите, а соработката меѓу училиштето и Полициската станица Кочани продолжува и во иднина, преку нови едукативни и превентивни активности.
