Согласно Законот за заштита на населението од заразни болести, а врз основа на одлуката на Советот на Општина Дебар за спроведување превентивна систематска дезинсекција на територијата на општината, како општа мерка, вечерва ќе биде спроведено запрашување против комарци.
– Станува збор за третото програмско запрашување против комарци, кое ќе се реализира вечерва од 18 до 6 часот наутро. Ќе бидат опфатени зелените површини во општината, крајбрежјето на Дебарско Езеро, депонии и пограничниот појас, урбаната населба Дебар, како и останатите локалитети предвидени во планот и програмата, информираа од општината.
Поради тоа, пчеларите и пчеларските задруги се советуваат да преземат соодветни мерки за заштита на пчелите.
– Запрашувањето со апарат за УЛВ ладно запрашување ќе го вршат екипи кои ќе спроведат терестичка, од земја, дезинсекција со цел уништување на комарците. Во случај на појава на неповолни временски услови, како ветар, дожд, дезинсекцијата се одложува за следниот поволен ден, посочуваат од општината.
Првата ваква акција беше реализирана на почетокот на јуни кога во рамки на програмата на општина Дебар за заштита од разни заразни и паразитски заболувања, што ги пренесуваат глодарите, се реализираше и првата фаза на дератизација (третман против стаорци) во градот. Втората систематска дезинсекција беше релизирана во средината на јули.
