Намалување на акцизите, трошоците за складиштење и за транспорт. Ова се дел од лепезата мерки за помош на граѓаните и бизнисите, кои ги анализира Владата и планира да ги воведе ако цената на горивата продолжи да расте.
Премиерот најави дека секојдневно се следи ситуацијата и ќе се реагира согласно потребите, но и дека уште е рано да се прогнозира каква одлука ќе донесе Регулаторната Комисија за енергетика во понеделник.
„Ќе ја следиме и понатаму состојбата и врз основа на тоа во периодот што следи ќе интервенираме. Доколку продолжи растот, следна мерка ќе биде намалување на акцизите и маржата, односно цената на складирање и транспортните трошоци“ – вели Христијан Мицкоски – претседател на Влада.
Активно се контролираат и маркетите и продавниците. Премиерот информира дека државниот пазарен инспекторат на терен ги чешла трговците со 30 тимови на инспектори кои проверуваат дали цените неосновано се зголемуваат и дали се трупаат залихи по стари цени за да се продаваат поскапо. Граѓаните претходно алармираа дека од стартот на кризата на Блискиот Исток, поскапеа јајцата, маслото за јадење и сувомеснатите производи.
„Триесет тима од Државниот пазарен инспекторат се на терен. И повторно тука од страна на опозицијата манипулираат дека различни типови маркети се посетуваат. Се гледаат сите трошоци и врз основа на тие трошоци носиме стратегија и политика. Нормално таму каде што ќе видиме дека постои непазарно однесување ќе делуваме како Влада“ – вели Христијан Мицкоски – претседател на Влада.
Инаку, и аналитичарите и препорачаа на Владата да внимава кога ќе воведе нови мерки против поскапувањата, бидејќи тоа ќе значи и пониски приходи во државната каса. Тие сметаат дека мерките треба да вклучуваат намалување на акцизите кои изнесуваат 22 денари за бензините и 15,5 денари за литар дизел, како и помош за најранливите категории граѓани кои се и најмногу погодени од растот на цените. Цената на Брент нафтата на светските берзи варира зависно од воените случувања на Блискиот Исток. Во моментов изнесува 111 долари за барел, што е за 8 долари поскапо од пред една недела, кога владата одлучи да го намали ДДВ на горивата од 18 на 10 проценти.
