Владата прави методологија за да се задржи истата цена на струјата, но се обидува и македонските граѓани да имаат и повтина струја, најави денеска при посетата на Штип, претседателот на Владата Христијан Мицкоски кој одговараше на новинарски прашања дали ќе се зголеми цената и каква е енергетската слика во земјата.
– За струјата, правиме методологија да се обидеме ако ништо друго, барем да ја задржиме истата цена, а зошто да не и да се обидеме да ја поевтиниме – изјави Мицкоски.
Тој истакна дека откако е оваа Влада граѓаните, домаќинствата реално немаат зголемување на цената на електричната енергија и покрај сите предизвици и како што рече „покрај тоа што сме во пикот на најголемата енергетска криза која што човештвото ја памети, а тоа е војната во Арапскиот Залив“. Премиерот посочи дека и покрај сите предизвици состојбата со струјата е стабилна.
- Покрај сите тие предизвици, денеска кога ме прашувате, јас можам да кажам дека состојбата е стабилна, ќе имаме стабилна зима, ќе имаме снабдување со електрична енергија согласно потребите на граѓаните и бизнисот. Ние, како Влада сме фокусирани на тоа, ги подготвуваме нашите производни капацитети. Грејната сезона ќе започне за месец и половина, еве максимум, зависно од временските прилики, некаде на почетокот на ноември, но ние ги подготвуваме енергетските капацитети, се подготвуваме за зимата и во таа насока ќе продолжиме и понатаму да се фокусираме – вели Мицкоски.
Премиерот Мицкоски додаде дека акумулациите се на ниво од близу 50%.
– Цела Европа се соочува со низок водостој на реките. Ова лето се исклучуваа нуклеарни централи, термоцентрали, хидроцентрали. Ние тоа не го правевме, напротив. Работиме со план, чекор по чекор. Знам дека не е сè идеално, знам дека е тешко, но е многу подобро од пред три години и убеден сум дека за три години ќе биде многу подобро од денес – подвлече Мицкоски.
Претседателот на Владата, истакна дека што се однесува до цените на горивата и на останатите нафтени деривати имаме убедливо најниски цени во регионот, до половина евро по литар пониски од земјите во регионот, ако се споредиме со Грција, Албанија, Србија.
– Се разбира дека и во моментот аплицираме мерки, а тоа е редуцираното ниво на акцизата, но во зависност од интензитетот на кризата така ќе ги димензионираме мерките. Затоа што многу е важно и да се одржи макроекономската и фискална стабилност на земјата во услови на ваков тип на глобални предизвици – две војни, сепак не е малку, а воедно да успеете да ја задржите стабилноста во буџетот, да генерирате раст којшто беше 4,3% на реална основа во вториот квартал, кој е само продолжување на растот од првиот квартал од 3,1%, да го спуштите нивото на инфлација од 2,3% и 2,6%, да го зголемите извозот – тој да расте побрзо од увозот, да ја зголемите вработеноста, да креирате нови 17.000 работни места и сето тоа се предизвици кои што изминативе 26-27 месеци се решаваат – рече Мицкоски по пуштањето на новиот Спортско-рекреативен центар „Џексон“ во Штип.
