Сега постоечката мерка со која ситните сточари се обврзани дури половината од своите јагниња да им ги предаваат на кланичарите, најчесто за многу пониска цена од нивната реална вредност, ќе биде ревидирана во интерес на сточарите, најавуваат од Министерството за земјоделство. Ова, всушност ќе биде и одговор на нивните неодамнешни барања, но и своевиден стимул за да опстојат во својот бизнис што пак, би условило и зголемување на стадата, а што е многу важно за државата, уверуваат од ресорното Министерство. Идеата е, намалувањето од сегашните 50 проеценти, а кои се превисоки за сточарите, да биде на 30 насто.
„Со оглед дека во месеците јануари и февруари, заради нискиот откуп на јагнето имавме доста прераснување на она што е првокласно јагне, ние како Министерство веќе размислуваме процентот од 50 да го намалиме на 30 проценти, се’ со цел уште еднаш да покажеме дека навистина како Влада и Министерство излегуваме во пресрет на секој еден земјоделец кој што се соочува со одредени предизвици“, изјави Цветан Трипуновски, министер за земјоделство.
Во наредниот период измени ќе претрпи и Програмата, а и уредбата која што го дефинира овој критериум, со крајна цел, како што вели Трипуновски, и оваа сточарска гранка да стане во успешна приказна во нашата држава.
„Јас, како ресорен министер одржав неколку состаноци и со Сојузот на одгледувачи на овци и со кланиците кои што се во регистрите на Министерството. Практично, откупната сезона, односно, откупот на јагнето е во завршна фаза. А анализите говорат дека имаме зголемување на откупната цена во споредба со минатата година и просекот е негде околу 230 денари“, – кажа Трипуновски.
Инаку, уште пред Велигденските празници, ситните пелагониски сточари соочении со овој проблем, но и со ниските откупни цени, како и со забраната за слободен извоз на јагнињата, на мирен собир побараа итна средба со надлежните за решавање на овие прашања и за долгорочно продуктивно надминување на состојбите во оваа земјоделска гранка.