Младите не треба да ги гледаме само како иднина на нашето општество. Тие се негов важен дел денес. Секоја идеја на млад човек заслужува да биде слушната, поддржана и реализирана, порача вечерва министерот за социјална политика, демографија и млади Ѓоко Велковски по повод 12 Август – Меѓународниот ден на младите.
– Овој ден не е само повод за честитки, туку можност да го истакнеме значењето на младите и да потврдиме дека нивниот глас, нивните идеи и нивното учество се од суштинско значење за развојот на нашата држава. Младите не треба да ги гледаме само како иднина на нашето општество. Тие се негов важен дел денес, изјави Велковски на доделувањето на наградите за младинско учество.
Задачата на институциите, како што посочи министерот за социјална политика, е да им се обезбеди на младите доволно простор, доверба и можност да ги изразат својот потенцијал.
– Кога ги слушаме младите создаваме подобри политики, кога ги вклучуваме во процесот на одлучување, носиме поквалитетни одлуки, а кога вложуваме во нив, вложуваме во иднината на целото општество, нагласи министерот Велковски.
Наградите што вечерва се доделени, според министерот, се признание за младинскиот активизам и за младите кои не чекаат некој друг да ги реши проблемите, туку тие самите преземаат иницијативи, организираат активности и помагаат.
Во категоријата „Младински организации, организации за млади и чадор младински организации“ наградата ја доби Здружението „Млади од семејна разновидност“. Министерот Велковски, кој ја додели токму оваа награда, рече дека е особено горд што оваа награда ја добива ова здружение кое работи со млади лица кои доаѓаат од различни семејни средини – еднородителски и згрижувачки семејства, деца без родителска грижа и други гформи на семејна разновисност.
Наградата во категоријата „Неформални групи на млади“ ја доби „Зелени пионери“ од Битола, а наградата во категоријата „Млади и безбедност“ ја доби Андреј Рајатоски.
За првпат годинава е доделена и наградата за партнери на младите во категорија „Службеник за млади“, награда што ја доби Владимир Смилевски.
