Собраниските преведувачи со полни раце работа, ги преведуваат речиси 6000 амандмани поднесени од ДУИ и ВМРО-ДПМНЕ на предлог изборниот закон за една изборна единица и отворени листи.
Денеска одново биле преземени речиси 2000 амандмани од 5000 на ДУИ кои се коригирани и повторно испратени до Собранието. Иако не се преведени, претседателот на комисијата за политички систем и пратеник на СДСМ, Александар Кирацовски ја закажа седницата на која меѓу другото ќе се расправа и за амандманите.
Вели дека големата бројка се должи на блокирање на предлог законот од страна на нивниот коалиционен партнер ДУИ, но и на опозициската ВМРО-ДПМНЕ.
Од ВМРО-ДПМНЕ пак велат дека е нон-сенс на три месеци пред избори да се менува изборниот законик.
Од ДУИ велат дека ваквиот предлог закон е опасен преседан, но и дека со реализирање на една изборна единица Албанците губат пратенички места.
И покрај големиот број на амандмани, премиерот Заев се надева дека на 12 април изборите ќе бидат со отворени листи и една изборна единица.
Предлогот за една изборна единица е поднесен од помалите политички партии, со оглед на големиот број на амандмани и краткиот временски период пред распуштање на собранието се поизвесно е дека останува стариот изборен модел со шест изборни изборни единици кои делегираат по 20 пратеници.
Мери Ѓоргиевска
