Уставниот суд утре треба да пресече дали членовите на Советот на јавни обвинители си дале права и поволности кои не им следуваат по закон.
Нивната колешка Ленче Ристеска, која е подносител на иницијативата, спори дека членовите на Советот на јавни обвинители со Деловникот утврдиле дека додека им трае мандатот во Советот, тој им се смета исто како да ја вршат функцијата јавни обвинители, а за тоа нема законска основа.
„Подносителката наведува дека за времетраењето на мандатот, членовите на Советот на јавни обвинители избрани од редот на јавните обвинители не вршат јавна-обвинителска функција и не може да бидат оценувани, односно тие во конкретниот период не може да реализираат „позитивно оценет јавни-обвинителски стаж“, се наведува во иницијативата на Ристеска, пренесува Уставниот суд.
Таму се тврди дека станува збор за прашање кое не може да се уредува со Деловник, бидејќи изворно не е уредено со законски пропис, па се остава впечаток дека членовите сами си доделиле право и поволности кои законодавецот не им го гарантирал.
„Од ова придобивка имаат самите членови, кои по завршување на мандатот во Советот на јавни обвинители се унапредени во повисоки позиции во јавните обвинителства“, се наведува во иницијативата на Ристеска.
