Во ООУ „Лазо Трповски“ денеска со почеток во 10 часот ќе се одржи свеченост на која ќе бидат врачени наградата и дипломите освоени на Меѓународниот училишен натпревар за воздушен и вселенски сообраќај 2026 во Берлин.
Како што информира училиштето, наградите на учениците од 4а одделение и на нивните наставници-ментори Ирена Грегориќ и Стефан Симовски ќе им ги врачи директорот на Агенцијата за цивилно воздухопловство, Драги Стојаноски. На настанот е најавено присуство и на градоначалникот на Општина Карпош, Сотир Лукровски.
Учениците од ООУ „Лазо Трповски“ наградата ја освоија за проектот „Нашето патување на Јупитер“, изработен како заедничка активност на четвртоодделенците со поддршка на нивните ментори.
Меѓународниот натпревар традиционално се одржува во Берлин и е наменет за ученици од трето и четврто одделение. Го организира Сојузното германско здружение за воздушна и вселенска индустрија во соработка со повеќе институции и компании од областа на воздухопловството и вселенската индустрија.
