Инспекциските служби на Општина Карпош одржале работна средба со колективниот постапувач „Еко Текс – Груп“ од Скопје, со цел проверка на досегашната реализација на активностите за собирање текстилен отпад, согласно договорот склучен во мај 2025 година – соопшти Општина Карпош.
Како дел од акцијата, посочуваат од Општината, специјални контејнери за текстилен отпад се поставени во сите десет основни училишта на територијата на Општина Карпош, градинките, како и пред административната зграда на Општината.
Според досегашните податоци, преку поставените собирни места се собрани околу 3.500 килограми стара облека и текстилен отпад, што претставува значаен резултат и показател за зголемената свест кај граѓаните за правилно управување со отпадот – наведуваат од Општината.
Општина Карпош ги повикува граѓаните одговорно да го одлагаат стариот текстил исклучиво во поставените контејнери, со цел да се придонесе кон почиста животна средина и поодговорно управување со отпадот.
