Интензивната истрага за трагедијата во Кочани и големиот број на докази може да се прошири со нови осомничени, но во оваа фаза од постапувањето министерот Панче Тошковски не може да открие детали. Во јавноста проструија информации дека на распит биле викнати и од актуелното раководство на Државниот пазарен инспекторат, но кој се ќе биде опфатен ќе се знае за 3 месеци откако ќе помине законскиот рок во кој Обвинителство ќе треба да поднесе обвинение.
Тошковски во гостувањето на телевизија Алфа посочи дека 11 обвинители заедно со истражители на МВР секојдневно собираат и анализираат докази, но и сослушуваат сведоци. Според него, вели дека има разлика како се постапува сега во однос на претходните години затоа што за трите поголеми случаи како Ласкарци, модуларната болница во Тетово и запалениот автобус во Бугарија немало поднесено ниту една пријава од страна на МВР.
Освен тоа што МВР не ни поднела кривични пријава за страотниот пожар во Тетово кој загинаа 14 луѓе, Обвинителството после обемната истрага ги обвини само двајцата поранешни директори на модуларната болница. Тогашниот државен обвинител Љубомир Јовевски во мај 2022-ра негираше дека истрагата се одвива бавно. Убедуваше дека, не само кабелот,туку сите инволвирани ќе бидат изведени на суд.