И уште еден судски пресврт. Таткото на судијата Ѓоко Ристов, во чиј дом беа пронајдени заѕиданите 350 илјади евра скриени во кујнски плочки, бил тој што им кажал на истражителите дека кујната ја користел неговиот син.
Ова во судница го откри обвинителката Искра Хаџи-Василева, презентирајќи докази против Ристов, кој е обвинет за перење пари и прикривање имот. Во судницата беше пуштена снимка од претресот во куќата во Неготино, а на видеото се гледа како истражителите ги кршат плочките, по што откриваат шуплина со завиткани пакети во фолии. Кога го прашале таткото кој ги ставил таму, тој одговорил: „Најверојатно синот Ѓоко од Скопје“.
Обвинителката презентираше и докази дека Ристов во 2017 година уважил жалба на Љупчо Пецов и донел одлука во негова корист, а подоцна, како апелациски судија, одлучувал и во други предмети поврзани со Пецов, меѓу кои и за условен отпуст во 2021 година.
Во судницата беа прикажани и снимки од средби меѓу поранешниот државен правобранител Фехми Стафа и судијата Ристов во скопска Апелација и пред зградата каде живее судијата. Стафа, кој како адвокат го застапувал Пецов, призна вина откако сестрата на Љупчо Пецов – Ѓаволот го пријавила дека барал поткуп, тврдејќи дека парите биле наменети за судијата Ристов.
