Водата од градскиот водовод во Струга сè уште е забранета за пиење. Иако денешната матност е во границите на нормалата, таа и понатаму не смее да се користи за пиење, туку само за лична хигиена и приготвување храна. Бидејќи струшките извори во Шум повторно имаат висока матност, водата не смее да се користи за водоснабдување на градот, велат од Центарот за јавно здравје.
Двонеделните испитувања на Институтот за јавно здравје покажале дека водата од изворите во Шум не е радиоактивна и нема присуство на тешки метали, но таа е физичко-хемиски неисправна.
Ова, според надлежните, е потврда дека обилните врнежи не се единствената причина за заматувањето, особено ако со денови нема врнежи. Експертите укажуваат дека санирањето на теренот и затворањето на ископите, длабоки над 10 метри на површина од 5 до 10 илјади кубни метри, бара многу внимателен пристап, бидејќи секоја интервенција повторно ќе ја заматува водата.
„Треба да се направи некој елаборат, односно да се изработи техничко решение за минимално влијание врз подземната вода. Сега треба да одлучиме дали ќе враќаме 5–6.000 кубни метри ископан материјал кој е однесен, дали ќе засипуваме со нов материјал или ќе искористиме локален материјал за насипување. Но, секој локален материјал подразбира ново копање, па на крај тоа треба да се ‘пломбира’ со помалку пропустлива почва или глина“, вели проф. д-р Петко Пеливаноски од Градежниот факултет во Скопје.
Дознаваме дека нуркачи кои вршеле подводно испитување на извориштето забележале пукнатини во карпестиот дел над самиот извор.
Во ваква состојба, која трае веќе 24 дена, надлежните сè уште размислуваат по прашањето што го покрена народниот правобранител – стружани да бидат ослободени од плаќање на сметките за вода за тековниот месец.
„Ние сме во постојана комуникација со градоначалникот и тој размислува во таа насока, но тоа треба правно и нормативно да се дефинира – како ќе се одвива“, вели Јованчо Мечкароски, директор на ЈП „Водовод“.
Инаку, комуналниот и градежниот отпад, кој претставуваше сериозна опасност за загадување на подземната вода што гравитира кон изворот, е исчистен – тоа е она што досега е направено. Стружани и понатаму ќе се снабдуваат со питка вода од цистерни, додека граѓанските активисти инсистираат да се прогласи кризна состојба во Струга.
