Од денеска почна собирањето податоци на македонските државјани кои влегуваат во Европската унија. Земјите-членки на Унијата на своите граници го воведоа новиот влезно-излезен систем за регистрирање на патниците кои не се жители на ЕУ. Со него, во 29 држави од Шенген-зоната ќе се регистрираат дигитално податоците од патните исправи, отпечатоците и биометриските фотографии.
Собраните податоци ќе бидат важечки во наредните три години. Моделот на проверка е наменет за зајакнување на безбедноста на границите, со цел заштита од илегална миграција и од терористички напади, информираат од Европскиот совет.
Грција најави дека во првиот месец ќе зема податоци од 10 проценти од патниците и ќе прави проценка кога да се спроведува оваа постапка, со цел да се избегнат гужвите на граница.
Бугарија, пак, според најавите, системот за влез и излез ќе го активира од крајот на октомври. Еднаш земените податоци ќе важат до рокот на важност на пасошот на патникот, а со нов пасош, постапката ќе треба да се повтори.
Системот во некои земји од Унијата ќе се воведува последователно во наредните шест месеци и ќе стане целосно оперативен на 10 април 2026 година.
Од крајот на идната година ќе почне и примена на системот за најавување и авторизација на патувањата во ЕУ – ЕТИАС, со кој преку интернет ќе треба да се најавите и да платите 20 евра за дозвола за патување пред влез во Унијата.
Од Министерството за внатрешни работи информираат дека во функција ќе бидат ставени сите расположливи материјално-технички средства за непречено одвивање на протокот на патници.
