Средношколци од 22 средни училишта од Град Скопје ќе се обединат во заедничка мисија посветена на животните и поддршката на Зоолошката градина Скопје, во рамки на дводневниот базар „100 години Зоолошка – 100 години грижа за животните“.
Базарот ќе се одржи денеска и утре од 12:00 до 15:00 часот, во Зоолошката градина Скопје, по повод одбележувањето на 100 години од нејзиното постоење.
На базарот средношколците ќе ги претстават своите креативни производи, ракотворби и изработки, кои посетителите ќе можат да ги купат, а средствата собрани од продажбата ќе бидат наменети за потребите на животните во Зоолошката градина.
Како што информираат организаторите, целта на настанот е да се поттикнат креативноста, емпатијата и одговорноста кај младите, како и нивната грижа кон животните. Истовремено, базарот претставува можност средношколците активно да се вклучат во одбележувањето на 100-годишниот јубилеј на една од најстарите институции во Скопје.
Од Зоолошката градина ги повикуваат граѓаните, семејствата и љубителите на животните да го посетат базарот, да ја поддржат креативноста на младите и да бидат дел од одбележувањето на јубилејот на Скопје ЗОО.
