Економските и политичките односи меѓу Македонија и Обединетото Кралство се на исклучително високо ниво, двете земји го негуваат стратешкото партнерство. Ова беше заклучено на средбата на вицепремиерот Александар Николоски со министерот за Европа и Северна Америка Стивен Даути во Лондон.
„Заеднички констатиравме дека односите се на исклучително високо ниво и дека во следниот период тие на следниот период ќе бидат на уште повисоко ниво. Заеднички разговараме за економската и политичката соработка, при што утврдивме дека двете држави се блиски партнери во рамки на НАТО Алијансата, а исто така дека Велика Британија е стратешки партнер на Македонија, а економскиот партнер број два, односно имаме извоз од 2,5 милијарди евра, што е втор најголем извоз што го остварува Македонија во било која странска држава“ вели Александар Николоски, вицепремиер и министер за транспорт
Вицепремиерот Николоски на средбата посебен акцент ставил на економијата. Тој вели дека инвестициските проекти поттикнуваат раст и развој на нашата држава но и на целиот регион особено преку модернизацијата на транспортните коридори како предуслов за раст на националните економии.
„Велика Британија е членка на Советот за безбедност на Обединетите нации, една од петте најмоќни земји во светот, втора најмоќна земја во НАТО Алијансата и вакво партнерство со Велика Британија може да значи многу и политички и економски за Македонија. На Македонија и се потребни вакви пријатели и ќе продолжиме да работиме со нашите западни сојузници“ вели Александар Николоски, вицепремиер и министер за транспорт
Николоски вчера имаше средба и со Герет Томас, министер за економија и извоз во Владата на Обединетото Кралство. Двајцата се согласиле дека постојат добри потенцијали за продлабочување на односите. Николоски очекува извозот кон Велика Британија, како наш втор трговски партнер, да расте и од постојните две и пол да надмине извоз во вредност од три милијарди евра.
Давид Крстевски
