Министерот за европски прашања, Орхан Муртезани, оствари продуктивна средба со министерот за надворешни работи на Турција, Хакан Фидан, во рамки на својата работна посета на Анкара. Средбата се фокусираше на важни прашања од политички, економски и социјален карактер, со акцент на зајакнување на билатералните односи и регионалната стабилност.
Министерот Муртезани ја истакна важноста на Турција како значаен политички и економски актер на Балканот. Турција игра централна улога во стабилизирањето на регионот и справувањето со глобалните и регионалните предизвици, вклучително и поддршката за економски раст и стабилност во земјите од Западен Балкан. Министерот подвлече дека оваа соработка има стратешко значење за унапредување на економските и политичките врски.
На средбата беше договорено дека унапредувањето на високиот политички дијалог меѓу Македонија и Турција е од суштинско значење. Двајцата министри се согласија за потребата од идентификување на точки од заемен интерес кои ќе овозможат уште поголема соработка, особено во областа на економијата, трговијата и културната размена.
Македонија, како мултикултурно и мултиетничко општество, особено ја цени поддршката на Турција во унапредување на социјалните структури и инклузивноста. Беше нагласено дека заедничките иницијативи за јакнење на општествените врски претставуваат модел на позитивна соработка што придонесува за стабилноста и развојот на регионот.
Министерот Муртезани потенцираше дека забрзаното интегрирање на регионот во европските структури претставува можност за зголемен раст и развој. Тој нагласи дека соработката со Турција, како важен сојузник во овој процес, е клучна за обезбедување на економска и политичка стабилност, како и за унапредување на евроинтегративните напори на Македонија.
Двајцата министри дискутираа и за важноста на стабилноста на енергетскиот сектор, како и можностите за заеднички енергетски проекти. Беше нагласено дека енергетската соработка претставува важен дел од билатералните односи и стратешки приоритет за обезбедување на одржлив развој.
Министерот Муртезани изрази благодарност за континуираната поддршка на Турција во процесот на интеграција на Македонија во европските структури. Тој ја нагласи заедничката визија на двете земји за стабилен, мирен и просперитетен Балкан, кој е интегриран во Европската Унија и подготвен да се справи со современите предизвици.
