Тензично на грчко-турската граница – со солзавец и водени топови грчките сили во обид да спречат влез на мигранти на грчко тло. Само ве регионот на Еврос за 24 часа биле спречени речиси 7000 обиди за нелегален влез. Уапсени биле дваесетина лица, најголем дел од Авганистан и Пакистан.
Во Македонија за сега нема поголемо раздвижување на мигранти, но опасноста е голема, вели заменик министерката за внатрешни работи Славјанка Петровска.
„Редовно сме информирани од колегите од грчката полиција и од Фронтекс и во координација со нив ќе го зголемиме бројот на полицајци доколку тоа е потребно“, рече Петровска.
Паника за нов наплив на мигранти во земјава предизвика објава во австрискиот весник „Остерајх“ во која се вели дека во Македонија веќе влегле 1000 мигранти, а веста ја темелат на фотографија од градски плоштад за кој не е наведена точната локација. Информацијата ја демантираше МВР посочувајќи дека станува збор за „лажна вест“.
Стравот од нова бегалска криза го мобилизира регионот – српската премиерка Ана Брнабиќ свика вонреден состанок со безбедносниот врв, на кој било заклучено дека ќе има нулта-толеранција за нелегалните преминувања. И претседателот Александар Вучиќ, потврди оти дал наредба херметички да се затворат границите во случај на нов мигрантски бран.
„Ќе ја затвориме границата во рок од 12 часа ако е потребно. Веќе почнавме да работиме на некои работи, но се надевам дека тоа нема да се случи“, вели Вучиќ.
Во меѓувреме, на социјалните мрежи осамна видео снимка објавена од страна на грчката крајбрежна стража – неофицијално станувало збор за турски воени сили кои намерно ги туркале чамците полни со мигрантите кон грчките води.
Вонреден состанок одржаа и министрите за надворешни работи на ЕУ. „Унијата останува решена ефикасно да ги штити надворешните граници, а незаконските премини нема да бидат толерирани“, соопштија од Советот на Европа. Ги повикаа турските власти да не ги користат мигрантите во политички цели.
Биљана Божиновска
