Советот на јавните обвинители на Македонија денеска го усвои новиот Правилник за спроведување на интервју во постапките за избор и начин на презентација на јавните обвинители. Со правилникот се обезбедува поголема транспарентност и формална рамка во процесот на избор.
Како што рече членот Ермон Незири, актот е во насока на усогласување со европското право и исправување на аномалии, со обврска кандидатите да се претстават пред јавноста.
– Се работи за подзаконски акти кои се во насока на усогласување на правото со ЕУ. Правилникот е составен од два дела. Едниот регулира начин на интервјуа, вториот се однесува на избор на шеф на ОЈО ГОКК. Ценам дека се исправаат некои аномалии, ставаме обврска за кандидатите јавно да се претстават. Направивме чекор, ако ништо друго, јавноста на една седмица ги види кандидатите – рече Незири.
Државниот обвинител Савески истакна дека со новите правила се гарантира објективност и се овозможува кандидатите јавно да се претстават.
– Со овој правилник се прави прогрес од два аспекти, во самиот процес на избор има транспарентност кој во доволна мера ја гарантира постапката, односно дека истата се одвива во некој начин каде што објективните критериуми ќе дојдат до израз, а од друга страна тоа што самите кандидати ќе имаат можност да се претстават себе си – рече Савески.
Членот на Советото, Ардиан Демири нагласи дека досега ваков правилник не постоел, а со него се систематизираат категориите и прашањата за кандидатите.
На денешната седница Советот го разгледа и оцени Годишниот извештај на Јавното обвинителство на Македонија за 2025 година, кој го презентираше државниот обвинител Савески.
Советот денеска ги усвои записниците од 48-та и 49-та седница, а беше донесена и одлука по приговорот за оценување на јавниот обвинител Оливера Нечаковска, која доби позитивна оценка со максимум бодови.
