Лидерот на Македонска алијанса за европска интеграција (МАЕИ), Васил Стерјовски, на маргините на Генералното собрание на Европската слободна алијанса (ЕФА), се сретна со Франческа Романа Д’Антуоно, италијанска политичарка и копретседател на Volt Europa, политичка сила застапена во Европскиот парламент.
-За време на средбата ја информирав за положбата и за предизвиците со кои се соочува македонското национално малцинство во Албанија, особено за притисоците и обидите за асимилација што доаѓаат од страна на Бугарија. Истакнав дека правото на слободно национално самоопределување и зачувувањето на македонскиот идентитет се темелни европски вредности кои мора да бидат почитувани и заштитени, информираше Стерјовски.
Бидејќи живее и работи во Рим, додава тој, предложив да ги посети Македонците од Албанија кои живеат во Италија, особено во Рим, и да присуствува на некоја од нивните традиционални прослави и собири.
Воедно, ја поканил да го посети македонското малцинство во Албанија и одблиску да се “запознае со нашата богата култура, традиција и секојдневните предизвици со кои се соочуваме”.
-Верувам дека преку дијалог, соработка и меѓусебно разбирање можеме да изградиме посилна поддршка за заштитата на човековите и малцинските права во Европа, нагласува тој.
Стерјовски учествува на Генералното собрание на ЕФА што се одржува во Гандија, Шпанија, каде на дневен ред е и разгледувањето и гласањето на резолуција поднесена од МАЕИ за заштита и унапредување на правата на Македонците во Албанија.
МАЕИ во 2024 година стана полноправна членка на Европската слободна алијанса.
