– Со изложба на дела од турската уметница Мелихат Тузун, насловена „По стапките на животот“, синоќа во Домот на културата „Иван Мазов – Климе“ беше отворена меѓународната ликовна колонија „Михајлово 2026“, на која учествуваат голем број ликовни уметници од земјава и странство. Колонијата се реализира со поддршка од Министерството за култура и туризам и локалната самоуправа.
На настанот беше кажано дека Тузун е член на Меѓународното здружение на ликовни уметници на Република Турција, претседател на Турското здружение на уметници за оригинална графика. Во 1995 година ја добила првата награда за оригинална графика од Фондацијата „Ајше и Ерџумент Камил“. Има одржано повеќе од 20 самостојни изложби во Турција и во странство и учествувала на бројни национални и меѓународни биеналиња, работилници и групни изложби. Нејзините дела се дел од колекциите на многу национални и меѓународни музеи, јавни институции и организации.
Директорот на Домот на културата, Методи Глигоров, рече дека станува збор за преубави пејзажи.
-Уметницата не ја разгледува природата само како поле на визуелно прикажување, туку и простор на искуство во кој се гледа преживеаното – истакна Глигоров.
Организаторот и куратор на ликовната колонија, Владимир Темков нагласи дека ова е нешто посебно за уметниците и љубителите на уметноста, затоа што се слави уметноста.
-Славиме 30 години од Кавадаречката ликовна колонија, една од најубавите и најголемите колонии во Република Македонија, а можеби и на Балканот – подвлече Темков.
Пред присутните се обратија и професорот Фехим Хусковиќ и уметницата Тузун.
Во рамките на настанот, беа доделени благодарници на општествено одговорни субјекти, кои дале придонес за одржување на колонијата низ годините.
