Најмалку 500 лица го загубија животот, а околу 1.000 се повредени во силниот земјотрес што ноќеска ја погоди источната авганистанска провинција Кунар, на границата со Пакистан, соопшти денеска државната авганистанска телевизија РТА.
Според здравствените власти во Кабул, кои се под раководство на талибанците, бројките сè уште не се официјално потврдени, бидејќи спасувачките екипи се обидуваат да стигнат до оддалечените и тешко пристапни подрачја.
Земјотресот со јачина од 6,0 степени се случил на полноќ, на длабочина од осум километри, предизвикувајќи големи оштетувања во планинските села.
Авганистан често се соочува со вакви природни катастрофи, особено во регионот Хиндукуш, каде што се спојуваат евроазиската и индиската тектонска плоча, што го прави еден од најпогодените сеизмички појаси во светот.
