Во услови кога туристите избегнуваат региони со безбедносни ризици, Македонија добива нова можност да се наметне како сигурна дестинација. Дел од европските гости веќе го прават тој избор – културно мотивирани туристи од Западна Европа веќе пристигнуваат надвор од шпицот на сезоната, што е добар сигнал. Но, довербата на туристите е кревка. Клучно ќе биде да се задржи реална ценовна политика и да се избегнат краткорочни профити на сметка на долгорочниот имиџ. Туристичката клиентела, еднаш изгубена, тешко се враќа. Случувањата на Блискиот Исток ги одвраќаат туристите да патуваат на атрактивните, но високо ризични дестинации.
„Да, Катар, Блискиот Исток, Египет, тоа е веќе со сигурност, но можеби ќе биде помалку од 10% посетата на овие дестинации, со што нè става во едно добро светло, добра позиција да извојуваме, да придобиеме една нова клиентела на овие простори. Но, треба да се преземат и чекори да не дојде до некои несакани проблеми, да не се злоупотребува ситуацијата, да се даваат реални цени за да можеме да ја задржиме клиентелата, која што, навистина, многу тешко може да се стекне, односно да се добие нивната доверба“, вели проф. д-р Климент Наумов, ФТУ Охрид.
Светските туристички мапи се менуваат, глобалните кризи носат и ризици. Дел од далечните пазари веќе реагираат со откажувања, што значи дека Македонија мора брзо да се прилагодува и да бара замена на тие пазари со нови. Она што охрабрува е отпорноста на домашниот туризам.
„Ние мислиме дека сме далеку од тој конфликт, но за оние далечни земји, ние не сме така далеку, затоа што прелетуваат преку точно тие зони. Барем, мислам дека има голем број откажувања од тие далекуисточни земји, особено што тој е најперспективен пазар во светот. Значи, таму Европа се храни со туристи, тие се најбрзорастечки пазари во светскиот туризам сега. Ќе има поместувања, но мислам дека туризмот, посебно во Македонија, е жилав. Но, треба да сме спремни, брзо да реагираме и да бараме евентуално, при откажувања од тие пазари, замена со други пазари“, вели проф. д-р Сашо Коруноски, ФТУ Охрид.
За разлика од некои земји, туристичкиот сектор кај нас веќе покажа дека знае да се опорави од кризи, што значи дека треба да сме спремни на такви поместувања и да се преориентираме на тековните движења. Ќе профитираат оние дестинации што ќе понудат безбедност, автентично искуство и коректни цени.
