Следниот месец почнуваат две судења за полицајците поврзани со трагедијата во дискотеката Пулс, обвинети за злоупотреба на службената положба. Во една постапка се опфатени тројца полицајци кои изминативе години влегувале во „Пулс“ и пишувал прекршочни пријави против неактивна фирма на сопственикот Дејан Јованов Деко, со цел тој да не плати глоба. Во другиот предмет опфатени се девет полицајци. И тие години наназад доаѓале во дискотеката проверувале дали е безбедна и дали има доволно паркинг места. Давале позитивна оценка и на тој начин озовможиле сопственикот Деко да вади лиценци за работа. Полицајците, првично беа осомничени за тешки дела против општата сигурност, но потоа Обвинителството оцени дека тие не се директно одговорни за пожарот, но сепак ќе одговараат за злоупотреба на службената положба. За трагедијата во Кочани обвинети се и полицајците од Источна Македонија што кобната вечер биле во дискотеката и вршеле акциска контрола. Станува збор за 13 полицајци, а меѓу нив има и неколку началници. Тие се обвинети за тешки дела против општата сигурност, но за нив обвинението се уште е на оценка во Кривичниот суд Скопје. Обвинителството ги товари дека тие не го спречиле палењето на пиротехниката, туку се занимавале со малолетници.
Според обвинението, во периодот од 14 до 16 март 2025 година обвинетите полициски службеници одобриле и спровеле план за акциска контрола на угостителски објекти без целосна проверка дали се испочитувани законските прописи и безбедносните процедури. При контролата во кабарето не биле преземени соодветни мерки за заштита на присутните лица, ниту било спречено користење на непријавена пиротехничка опрема, што довело до настанување на пожарот, соопшти Обвинителство за гонење на организиран криминал и корупција на 30.01.2026.
Со оглед на тоа што на дел од полицајците им се запре постапката со образложение дека не се директно одговорни за трагедијата и ќе им се суди за злоупотреба, се јави револт кај дел од бранителите на 35-те обвинети за пожарот, чие судење е во тек.
Тие побараа од Јавното обвинителство да го преиспита обвинението и делата што им се ставаат на товар на нивните клиенти. Меѓу обвинетите во овој судски процес се сопственикот на „Пулс“, неговите најблиски соработници, градежни и пазарни инспектори, поранешни министри за економија, службеници во Министерството за економија, поранешни градоначалици на Кочани, обезбедувачи во дискотеката и поранешни директори за Дирекцијата за заштита и спасување. Сите се обвинети за тешки дела против општата сигурност, а обвинителство нивното непостапување директно го поврзува со настанувањето на трагедијата.
