Системот во Македонија проработе по трагедијата во Кочани и воопшто нема потреба од политичка лидерска средба, сметаат познавачите. Поранешниот амбасадор Звонимир Јанкуловски вели дека во овој момент политиката треба да се тргне на страна, да се остави на институциите да си ја работат работата, дебатата за оваа трагедија да се води во собранието, а не на маса меѓу неколку политички лидери.
-Системот во случајот на трагедијата во Кочани делуваше многу брзо и многу ефикасно, не знам што би можело да се разговара на тие лидерски средби затоа што сепак има други механизми, политички механизми низ кои може да се артикулира одреден политички став. Така што не гледам воопшто ни причина, ни не ги гледам лидерските средби како начин на субститут на нешто што би се нарекло парламентарна демократија, вели Јанкуловски.
Според премиерот Христијан Мицкоски не е време за лидерска средба, но подготвен е да се сретне со Филипче во четири очи, каде лидерот би го образложил својот план. Средба од поширок формат во моментов според Мицкоски не е потребна. На ист став е и Јанкуловски.
-Племенска демократија која се залага во Македонија, да се бајпасира целиот државен систем на начин што политичките партии се среќаваат за клучни, да кажеме клучни прашања, политички прашања или прашања за иднината државата, вели Јанкуловски.
Според Јанкуловски одредени структури се обидуваат во Македонија да пренесат сценарио од други држави преку организирање протести за оваа трагедија, иако според него јасно е дека системот си ја врши својата работа.
-Она што е разочарувачки дека некои ветрови генерално во регионот и на Балканот и меѓу државите кои се релативно поврзани, во контекст на возобновување на некој вонпарламентарни, вонпретставнички инситуции, се нудат за решение за надминување на тие демократски институции во државите, изјави Јанкуловски.
Филипче најави дека во текот на оваа недела ќе соопшти кои се темите поради кои бара лидерска средба, а онаа која што е позната дека сака независен кандидат за градоначалник на Кочани, за кој би застанале ВМРО-ДПМНЕ, СДСМ и сите други партии. На ова Мицкоски одговори дека е прерано за вакви договори, бидејќи се уште не се зацелени раните од трагедијата. Според тоа не само непримерно, туку и додатна болка за оние кои ги изгубиле своите најблиски.
Матеја Петровски
