Наставниот и ненаставниот кадар од академската фела во земјава, кој веќе трета година е синдикално организиран, задоволен од досегашното синдикално делување. Неодамнешното формирање на синдикатите и потпишувањето на колективните договори, ги даваат првите резултати. Платите и условите за работа, сега се креираат транспарентно и во согласност со реалните можности во оваа сфера, со следење на европските принципи каде вработените се претставувани исклучиво од Синдикатот. Ова беше потенцирано на Панел-дискусијата која беше организирана на УКЛО Битола под мотото „Положбата на вработените во високото образование во Македонија“.
„Синдикалното членство настапува академски, достоинствено, ги разбира проблемите што ги има Уноверзитетот и не бара, она што нардоски би се рекло „преку леб, погача“. Туку гледа во рамките на располжливиот буџет, максимално да се искористи за добробит на вработените. А наша обврска, на раководствата, е да бидеме крајно транспаренти, за секој вработен, а особено Синдикатот, да знае како се трошат финансиите што ги обезбедува Универзитетот“, – вели проф. д-р Игор Неделковски, ректор на УКЛО – Битола.
„Најголем успех беше што успеавме да формираме Синдикат, да го регистрираме, да преговараме со Собранието на РМ и да потпишеме колективен договор со кој се гарантирани платите на вработените, условите за работа на сите“, – појаснува проф. д-р Саша Дуковски, претседател на Синдикатот при УКЛО – Битола.
„Може да се каже дека последните две години имаме достоинствени плати во високото образование. Сега останува на вработените со нивната работа да покажат и да докажат дека овие плати ги заслужуваат, се’ со цел да се подобри квалитетот во високото образование, со пишување на трудови, книги, подобрување на квалитетот на студиските програми“, – посочи проф. д-р Ангел Ристов, претседател на Унијата на синдикати во високото образование во Македонија.
Синдикалното организирање во академската сфера за првпат се реализираше пред три години, најпрвин на УКИМ во Скопје. Пред две години пак, фомирана е Унијата на синдикати во високото образование во Македонија, а потпишани се и колективните договори со сите универзитети во земјава.
